ភ្នំពេញ៖ កម្ពុជាអាចនាំចេញផលិតផលជលផលធម្មជាតិសំខាន់ៗចំនួន ១២ប្រភេទដូចជា បង្គា ត្រី អន្ទង់ និងខ្យងជាដើម ទៅកាន់ទីផ្សារចិននៅក្នុងឆ្នាំ២០២៣នេះ ក្រោយក្រុមហ៊ុននាំចេញបានបញ្ចប់ការចុះបញ្ជីនៅក្នុងប្រព័ន្ធ «ព័ត៌មាននចុះបញ្ជីក្រុមហ៊ុនផលិតអាហារនាំចូលពីបរទេស» របស់រដ្ឋបាលគយនៃប្រទេសចិនរួចរាល់នៅចុងខែឧសភានេះ។

បើតាមព័ត៌មានផ្សាយនៅទំព័រហ្វេសប៊ុករបស់ស្ថានទូតចិនប្រចាំនៅកម្ពុជា ក្រុមហ៊ុនដែលត្រូវបានអនុញ្ញាតឱ្យនាំចេញផលិតផលជលផលធម្មជាតិទាំង១២មុខទៅទីផ្សារចិននៅក្នុងឆ្នាំ២០២៣ គឺក្រុមហ៊ុន KIM CHOU Co., Ltd. Import Export and International Transportation។

គួរឱ្យដឹងដែរថា កាលពីខែវិច្ឆិកា ឆ្នាំ២០២២ ចិន និងកម្ពុជាបានចុះហត្ថលេខារួមគ្នាលើពិធីសារស្តីពីលក្ខខណ្ឌ តម្រូវការត្រួតពិនិត្យ និងអនាម័យផលិតផលជលផលធម្មជាតិក្នុងការនាំចេញពីប្រទេសកម្ពុជាទៅកាន់ប្រទេសចិន៕